ئەفسانەی  دوای كشانەوەی مارێنزەكان

دواجار باراك ئۆباما سەرۆكی ئەمریكا، بەڵێنەكەی بردەسەر كە لە بانگەشەی هەڵبژاردن بەگەلی ئەمریكای دابوو، ئەمیش كشانەوەی سوپای ئەمریكا بوو، لە عێراق. بەجێگەیاندنی بەڵێنەكەی ئۆباما لە كاتێكدایە، عێراق هێشتا نەیتوانیوە، كۆنتڕۆڵی رەوشی ئاسایش لەناوخۆی وڵات لەلایەك ‌و پاراستنی ئاسایشی خاكی عێراق لە بەرانبەر وڵاتانی ئیقلیمی بپارێزێت، ئەگەرچی ئەگەری سەرهەڵدانەوەی شەڕی ناوخۆ ‌و كودەتای سەربازی لە ئێستادا بەدوور دەزانرێ، بەڵام چاودێران ‌وبەرپرسانی سەربازی مەترسی كۆنتڕڵكردنی پایە گرنگەكانی دەزگا سەربازی ‌وهەواڵگرییەكان دەكەن بە دەستی حزبە سیاسییەكانی عەرەبی سووننە ‌و عەرەبی شیعە ‌وئەفسەرانی پێشووی حزبی بەعسی هەڵوەشاوە ، مەترسی ئەوەش لەوەدا دەبینەوە كە ئەم دەزگا نیشتمانیانە بۆ مەبەستی سیاسی بەكاربهێنرێت.

بەدواداچوونی فەرمان سادق:

ئەمریكا لە عێراق ناكشێتەوە
لەبارەی كشانەوەی سوپای ئەمریكا لە عێراق، عەمید ئیبراهیم خەلۆ راوێژكاری سوپای ئەمریكا لە بنكەی سەربازی موسڵا جەخت لەوە دەكاتەوە كە ئەمریكا عێراق جێناهێڵێت، سەبارەت بە ئاكامە نێگەتیڤیەكانی ئەو كشانەوەیەی سوپای ئەمریكا دەڵێت "ئەگەر ئەمریكا بە تەواوەتی عێراق جێبهێڵێت، ئەوا كاریگەری زۆری لێدەكەوێتەوە، چونكە حزبە سیاسییەكان بەگژ یەكتریدا دەچنەوە‌و شەڕی ناوخۆ، دووبارە سەر هەڵدەداتەوە ‌و خەڵكێكی زۆریش بەهۆیەوە دەكوژرێت". ئەو راوێژكارەی سوپای ئەمریكا تایبەت بۆ (شەقام) ئەوەی خستەڕوو بە كشانەوەی سوپای ئەمریكا هیچ كودەتایەكی سەربازی بە تایبەت لەلایەن ئەفسەرانی پێشووی رژێمی بەعس كە ئێستا لەریزی وەزارەتی بەرگری‌و دەزگا هەواڵگرییەكانن روونادات، بەڵام "دەتوانن كۆنتڕۆڵی رەوشی سەربازی لە عێراق بكەن بە ئاراستەیەكی سیاسی دیاریكراو". زیاتر گوتیشی "لە ئێستادا حزبە سیاسییەكان كۆنتڕۆڵی عێراقیان كردووە، ئەمیش لە ڕێگای ئەو هێزەی پەیدایان كردووە، نەك لە رێگەی خەڵكەوە، ئەمەش لەگەڵا بنەماكانی دیموكراسیدا ناگونجێت".
ئەو راوێژكارەی سوپای ئەمریكا, رای وابوو دوای كشانەوەی سوپای ئەمریكا عێراق ئاڵۆزی بەخۆیەوە دەبینێ، كشانەوەكەشی لە ئێستادا بەتەكتیك ناوبرد بۆ ئەوەی بە وڵاتانی ئەوروپا‌و عەرەبی‌و جیهان بڵێ ئەمریكا پابەندە بە بەڵێنەكانی, بەڵام ناتوانێ عێراق بەمجۆرە بەجێبهێڵێ, گوتیشی "بەڵگەم ئەوەیە ئەمریكا لە ئەفغانستان نەكشایەوە, تەنانەت داوای هێزی زیاتریان كرد، بەڵگەیەكی تریش ئەمریكا تیرۆری لە یەمەن دروستكرد چونكە (71%)ی ئەو بەندكراوەكانی گرتوخانەی گوانتانامۆ ئێستا لەریزی حوسییەكاندا دژی دەوڵەتی یەمەن دەجەنگن، هەموو ئەمانەش بۆ ئەوەیە هێزەكانی سوپای ئەمریكا كۆنتڕۆڵی یەمەن ‌و گەروی (باب المندب) بكەن".
بۆچوونی راوێژكاری سوپای ئەمریكا لە موسڵا لە كاتێكدایە بابەكر زێباری سوپاسالاری عێراق لە لێدوانێكی تایبەت بۆ (شەقام) جەختی لەوەكردەوە كە عێراق پێویستی بەهێزەكانی ئەمریكا هەیە تا ساڵی (2020), سوپا سالاری عێراق لەكاتێكدا پرسی پێنەكرا لە كشانەوەی سوپای ئەمریكا, هۆكاری ئەم پێویستیە بۆ ئامادەنەبوونی سوپای عێراق گەڕاندەوە لەهێزەكانی ئاسمانی‌و دەریایی بەتایبەت لەكەنداوی عەرەبی. لەبارەی ئەم بۆچوونەی سوپا سالاری عێراق، راوێژكارەكەی سوپای ئەمریكا باسی لەوەكرد لەئێستادا هیچ حزبێكی سیاسی ناتوانێ كۆنتڕۆڵی عێراق بكا, لە هەمانكاتدا ململانێ سیاسییەكان بەمشێوەیەی ئێستا هەیە ئەگەر بەردەوام بێ ئەگەری ئەوەی لێدەكرێ لەساڵانی داهاتوودا توندڕۆیی سەر هەڵبداتەوە, گوتیشی "بۆیە جەخت دەكەمەوە كە ئەمریكا عێراق جێناهێڵێت, چونكە ئەگەر ئەم كارە بكات عێراق دابەشی چەندین ناوچە دەبێت بەگوێرەی هێزی لایەنە سیاسییەكان". لای خۆشیەوە بابەكر زێباری ئەوەی خستەڕوو كە سوپای عیراق دەتوانێ ئاسایشی ناوخۆی وڵات بپارێزێ, ئەگەرچی تیرۆر تائێستاش لەعێراقدا ماوە بەڵام "وەك پێشوو مەترسی لێناكرێت". زیاتر گوتیشی "كێشەی ئێستای عێراق پاراستنی سنوورەكانیەتی, چونكە ئەگەر ئەمریكا ساڵی (2011) عێراقی بەتەواوی جێهێشت, ئەوا تواناكانی سوپای عیراق ناتوانێ سنوورەكان لە ئاسمان‌و وشكانی‌و ئاویی بپارێزێت". زیاتر گوتیشی "توانا سەربازییەكانی عێراق بۆ پاراستنی سنوورەكان تا ساڵی (2020) دەخایەنێت, ئەمەش بەستراوەتەوە بەمیزانیە, بەڵام لەئێستادا میزانیەكە وەك پێویست نییە". سوپا سالاری عێراق ئاماژەی بەوەدا عێراق پێویستی بەرێككەوتنی ستراتیژی لەگەڵا ئەمریكا‌و وڵاتانی ئەوروپا هەیە, گوتیشی "تا ساڵی 2011 ئاسمانی عێراق لەدەست ئەمریكادایە, بۆیە عێراق ناتوانێ پەرە بەتواناكانی بدات لەرووی ئاسمانی". لای خۆشیەوە عادل بەرواری ئەندامی پێشووی لیژنەی ئەمن‌و بەرگری لەپەرلەمانی عیراق, پشتگیری لەهەڵوێستەكەی بابەكر زێباری كرد‌و گوتی "ئەركی وەزارەتی بەرگرییە سنوورەكان بپارێزێت, ئەگەرچی لەرووی وشكانی سوپا ئامادەیە, بەڵام لەرووی ئاسمانی‌و دەریایی هێشتا لە عێراق بوونی نییە, رەنگە تا دە ساڵی تر ئەم لایەنە پڕ چەك نەكرێت بۆ پاراستنی سنوورەكان". زیاتر گوتیشی "بەڵام كەس ناتوانێت كاریگەری لەسەر بڕیارەكانی ئەمریكا هەبێت, ئەمە پابەندبوونی ئۆباما بوو بەبەڵێنەكەی بەرانبەر گەلی ئەمریكا". لای خۆشیەوە ئەنوەری حاجی عوسمان بریكاری وەزارەتی پێشمەرگە رایوابوو كەئاڵۆزی سیاسەتی حكومەتی عێراق كارێكی وایكردووە كە ببێتە هۆی ئەوەی زۆرجار بڕیارەكان بە "هەڵە" دەربكەن, گوتیشی "كشانەوەی سوپای ئەمریكا موجازەفەیەكی زۆر گەورەبوو عێراقیەكان پێی رازی بوون, دەبوایە ئەگەر ئەمریكایەكانیش بڕیارێكی لەمجۆرەی بدابووایە عیراقیەكان رازی نەبوونایە". زیاتر گوتیشی "هاوڵاتیان باجی ئەم هەڵەی سیاسییەكانی عیراق دەدەن, چونكە بچووكترین گەرەنتی بۆ هاوڵاتیان نییە بچنە بازاڕەوە, بەلای منەوە پەشیمان دەبنەوە".

سوپا‌و دەزگا هەواڵگری‌و ئاسایشی عێراق لەژێر رەحمەتی حزبە سیاسییەكاندا
حزبە سیاسییەكانە لەریزی سوپا‌و دەزگا هەواڵگری‌و ئاسایش، لەمبارەیەوە ئیبراهیم خەلۆ ئەم تەقینەوانەی ئەمدواییەی بە هێمایەك ناوبرد بۆ شەڕی ناوخۆ، گوتیشی "بۆیە لەسەر عێراقیەكان پێویستە هەوڵەكانیان بخەنەگەڕ بۆ بەرەنگاربوونەوەی ئەم تەقینەوانە، چونكە سەركردە عێراقیە لەسەر خزمەتكردن‌و بەڕێوەبردنی وڵات ناكۆكن, ئەوان هەوڵی بەهێزكردنی پێگەی خۆیان دەدەن". لای خۆشیەوە بابەكر زێباری سوپا سالاری عیراق تایبەت بە(شەقام) گوتی"ئێمە وەك سەرباز هیچ پەیوەندییەكمان بە كێشە سیاسیەكانەوە نییە, سەرباز كاری خۆی دیارە, بۆیە ئەو تەنگەژە سیاسییەی ئێستا هەیە كاریگەری لەسەر دەزگا سەربازی‌و هەواڵگرییەكان نابێت". زیاتر گوتیشی "بەڵام رەنگە كاریگەری لەسەر كردەوە تیرۆرستیەكان ‌و هەندێك لە بنكە سەربازییەكانەوە هەبێت كە لەگەڵا حكومەتی عێراقدان ‌و دەستیان لە ئاژاوە گێڕیدا بێت".
لەبارەی مانەوەی ئەو پەنجا هەزار سەربازەی سوپای ئەمریكا, راوێژكارەكەی سوپای ئەمریكا دەڵێ "تەنانەت ئەگەر پێنج سەربازی ئەمریكیش لەعێراق بمێنێتەوە دەتوانێ كۆنتڕۆڵی عێراق بكات". زیاتر گوتیشی "چونكە ئەم سوپایەی دەمێنێتەوە راستەوخۆ پەیوەندی بەسەركردایەتی گشتیەوە هەیە, ئەوانیش لای خۆیانەوە هاوكاری راستەوخۆ پێشكەشدەكەن لە رێگای بنكەكانیانەوە". ئەو راوێژكارە رایوابوو مانەوەی سوپای ئەمریكا لەناوچە دابڕێندراوەكان لە هەرێمی كوردستان, لەبەرژەوەندی كورددایە ‌و كار بۆ ئەوە دەكەن ئەو ناوچانە بگەڕێندرێننەوە سەر هەرێمی كوردستان, گوتیشی "زۆرێك لەئە فسەرەكانی سوپای ئەمریكاش ئاگاداری ئەم مەسەلەیە نین". لای خۆشیەوە بابەكر زێباری ئەو دەنگۆیانەی رەتكردەوە لەكشانەوەی سوپای ئەمریكا پرسی پێنەكرابێ, ئەو گوتی"پرس بە ئێمە كراوە‌و رای خۆیشمان دەربڕیوە, بەڵام ئەمە بڕِیارێكی سیاسییە ‌و ئێمە پەیڕەوی دەكەین. چونكە سەرباز سیاسەت داناڕێژێت بەڵكو جێبەجێی دەكات". لە بارەی ئەم پەنجا هەزار سەربازە ئەمریكیەش, بابەكر زێباری گوتی "هیچ پێویستیەكمان بەو تیمە نابێت كە لەعێراق دەمێننەوە, تەنها ئەوە نەبێت ئەوان دەبێت ئاسمانی عێراق بپارێزن". بە بڕوای عادل بەرواری ئەو كێشە سیاسییەی لەنێوان كوتلە سیاسییەكاندا هەیە كاریگەری زۆری دەبێ لەسەر رەوشی ئاسایش, گوتیشی "پاشماوەی رژێمی بەعس‌و تیرۆریستان سوود لەم رەوشە وەردەگرن". زیاتر گوتیشی "لەگەڵا ئەمەشدا كشانەوەی سوپای ئەمریكا سەركەوتن بوو بۆ سوپای عێراقی كە توانیوەیەتی ئاسایشی لەماوەی دوو ساڵی رابردوودا ئاسایشی شارەكانی عێراق بگرێتە ئەستۆ‌و سەكەوتووش بووە لە ئەرەكەكەیدا". ئەو ئەندامەی پێشووی پەرلەمانی عێراق ئاماژەی بەو خاڵانەدا كە لە كشانەوەی سوپای ئەمریكا جێگەی مەترسین, لەوانە بەردەوامبوونی كێشە سیاسییەكان كە خاڵێكی گرنگە, هەروەها پتركردنی چالاكی دەزگا هەواڵگری‌و ئاسایش‌و چێ كردنی هاوكاری لەگەڵا هاوڵاتیانی عێراق, گوتیشی "ئەگەر ئەمریكا دڵنیا نەبووایە سوپاكەی لە عێراق نەدەكشاندەوە دوای ئەم هەموو قوربانی‌و خەرجیە". زیاتر گوتیشی "تا پانزە مانگی تر هیچ مەترسیەك رووبەڕووی عیراق نابێتەوە, چونكە سوپای ئەمریكا لەعێراق بوونی دەمێنێت, بەڵام مەترسیەكە دوای ئەم پانزە مانگەیە, بۆیە لەم ماوەیەدا دەبێت عیراق چەك‌و فڕۆكەی جەنگی زۆر بكڕێت بۆ پڕكردنەوەی ئەم بۆشاییانە". هاوكات ئەنوەری حاجی عوسمان باسی لەوەكرد كەحزبە سیاسییەكانی ئێستا دەیانەوێ حوكمڕانی عێراق بكەن, ناتوانن لەئاییندە گەرەنتی سەر‌وماڵی هاوڵاتیان بكەن, لەبارەی كاریگەری كشانەوەی سوپای ئەمریكا بەسەر ئاسایشی هەرێمی كوردستان, ئەنوەری حاجی عوسمان گوتی "هیچ كاریگەرییەكی نەرێیی لەسەر ئاسایشی كوردستان نابێت ‌ومەترسی لەوەدا نابینم". زیاتر گوتیشی "مەترسیەكە لەوەدایە تیرۆر‌و رێكخراوە تیرۆریستیەكان لە نێو ریزەكانی سوپا‌و هەواڵگری ‌و ئاسایش جێگەی خۆیان بكەنەوە, كە لێی دەپرسی پۆلیسە, كە ورد دەبێتەوە لێی تیرۆریستە. لەگەڵا ئەمەشدا ئەوانە ناتوانن مەترسی لەسەر ئاسایشی كوردستان دروستبكەن".

پێنج ئەفسانەی كشانەوەی سوپای ئەمریكا لە عێراق
دوو هەفتە بەر لەكشانەوەی دوا لیوای جەنگاوەری سەربازی سوپای ئەمریكا لەعێراق‌و بەڕێكەوتنی بۆ كوەیت، (بۆلاك كینیس) بەڕێوەبەری سەنتەری (سابان) بۆ سیاسەتی خۆرهەڵاتی ناوەڕاست لەدامەزراوەی (برۆكینگز)ی ئەمریكی، لە ڕاپۆرتێكدا كە لە ڕۆژنامەی (واشنتۆن پۆست) بڵاوكراوەتەوە ئاماژە بەكشانەوەی سوپای ئەمریكا لە عێراق دەكات ‌و لە پێنج خاڵدا كە ناوی ناون پێنج ئەفسانەی كشانەوەی سوپای ئەمریكا دەیانخاتەڕوو.
ئەم خستنەڕووە لەكاتێكدایە ئێستا هێزەكانی ئەمەریكا لە عێراق ژمارەیان (50) هەزار سەربازە ‌و لەژێر ناوی (تیمی یارمەتی‌و راوێژ) هاوكاری دەزگا سەربازییەكانی عێراق دەكەن، ئەم ژمارەیەش لە دوای داگیركردنی عێراق لە ساڵی (2003) تاوەكو ئەمڕۆ كەمترین ژمارەیە. نووسەری راپۆرتەكە پێنج خاڵەكە بەمشێوەیە دەخاتەڕوو:
یەكەم: نزیكەی (50) هەزار سەرباز لە هێزەكانی ئەمەریكا لە عێراق دەمێننەوە، كە زۆربەیان هێزی چەكدارین، بەڵام بەناوی (تیمی یارمەتی‌و راوێژكاری). لە راستیدا تەنها گۆڕانكاری لە پێكهاتەی تیمە سەربازییەكان روویداوە بە كەمبوونەوەی ژمارەیان، چونكە هێزە سەربازییەكانی ئەمەریكا، هێشتا رووبەرووی زۆر رێگەی ناخۆش دەبنەوە، لەوانە یارمەتی هێزە عێراقیەكان لە هەر ئۆپەراسیۆنێكی سەربازی، بۆیە دەبێت هەمووكات ئەو هێزانە لەئامادە باشیدابن بۆ شەڕكردن.
لەماوەی (12ـ18)مانگی رابردوودا توندوتیژی لە عێراق كەمبۆتەوە ‌و مەترسی شەڕی ناوخۆش نەماوە‌و تیرۆریش كەمبۆتەوە، بۆیە ئەمەریكیەكان دەتوانن مەلەفی ئەمنی ڕادەستی عێراقیەكان بكەن، بەمەش لەمەودوا ئەركیان تەنها پاراستنی ئاشتی دەبێت. بۆیە كشانەوەی هێزەكان رووینەدا تا ئەوكاتەی كۆتایی بەملیشیاكان ‌و ئەوانەی لە دژی حكومەت دەجەنگان لە ساڵی (2008)دا هێنرا.
دووەم: لە دوای رۆژە ناخۆشەكانی ساڵانی (2005-2006) رەوشی ئاسایش لە عێراقدا بەشێوەیەكی بەرچاو بەرەو باشی رۆیشتووە، بەڵام شارەزایان پێیانوایە نازانن چی روو دەدات لە ساڵانی داهاتوودا، بە گوێرەی ئەو لێكۆڵینەوانەی لەسەر شەڕی ناوخۆییەكان ئەنجامدراون وا دەردەخەن، لەوكاتەی حكومەت لە ناو دەچێت زۆر هۆكار دروستدەبن بۆ هەڵگیرساندنی شەڕی ناوخۆ، لەوانە شەڕ لەپێناو دەسەڵات، سەڕەرای بوونی ترس‌و توڕەیی‌و ئیرەیی ‌و تۆڵەسەندنەوە كە هۆكارێكی یارمەتیدەرە بۆ دروستبوونی شەڕی ناوخۆ. بە گوێرەی لێكۆڵینەوەكان لە سەدەكانی رابردوودا دەركەوتووە لە(50%)ی شەڕە ناوخۆییەكان بۆ ماوەی (5)ساڵ بەردەوام دووبارە دەبێتەوە. بە تایبەتی لەو وڵاتانەی كە زێڕو ئەڵماس ‌و نەوتیان هەیە. لێكۆڵینەوەكان دەریانخستووە تەنها بەبوونی حكومەتێكی بەهێز دەتوانرێ ئاشتی سەقامگیر بكرێت ‌و لەگەڵا بوونی لایەنێك كەیارمەتی حكومەت بدات بەمەش رێژەی شەڕەكان كەم دەكاتەوە، بۆیە رۆیشتنی ئەمەریكا لە عێراق زۆر گرنگە و جێگای بایەخە.
بەگوێرەی لێكۆڵینەوەكان ئاماژە بەوە دراوە كە هاوڵاتیان حەز بە شەڕی ناوخۆ ناكەن، چونكە پێیانوایە كارەسات بۆ وڵات دەهێنێت، بەڵام سەركردە سیاسیەكان پێیانوایە كە تەنها بە شەڕكردن دەتوانن مەرامەكانیان بهێنەدی.
سێیەم: ئەمریكا عێراقی جێهێشت لە كاتێكدا سیستەمی سیاسی بە تەواوی تێكچووە، هەندێك لایەن گەیشتوونەتە ئەو بیروڕایەی كە شەڕی ناوخۆ لەعێراق روونادات، بەڵام هەندێك پێیانوایە گۆڕانی ستراتیجیەتی ئەمریكا لە ساڵی (2007-2008) لەعێراق هیچ گۆڕانكاریەكی دروست نەكردووە، گفتوگۆكردنیش لەناو هێزە سیاسیەكان زیادی كردووە، ئەمەش مەترسی ئەوەی لێدەكرێ لەچەند ساڵی داهاتوودا جێگای شەڕ بگرێتەوە. چونكە سەركردەكان ناچارن دیموكراتی قبوڵ بكەن، ئەگەرچی هەندێكجار رەتی دەكەنەوە، بەڵام پێویستە قەناعەت بەخەڵك بێنن دەنگیان پێبدەن، پێویستە هەرچی دەنگدەر دەیەوێت جێبەجێ‌ بكەن، دەبێت زۆر وردبن لەجێبەجێكردنی ئەو داواكاریانە. سیاسەتی عێراق هێشتا بە قۆناغێكی خراپ تێپەڕ دەبێت، ئارامی‌و ئابووری هێشتا پێویستیان بە سیاسەتێكی سەركەوتوو هەیە، بەڵام دەتوانین گەشبین بین بە داهاتووی عێراق، ئەگەر بەراستی ئەمریكاو وڵاتانی دراوسێ‌ یارمەتی عێراق بدەن.
چوارەم: عێراقیەكان خوازیاری مانەوەی هێزەكانی ئەمریكان یان رۆیشتنیان، ئەمە پرسێكە دەبێت زۆر وردبین بین لەگەڵا رای گشتی عێراقیەكان، چونكە زۆر زەحمەتە لە بۆچوونەكانیان بگەین، بەتایبەت ژمارەیەكی زۆركەم دەیانەوێت ئەمریكا لەعێراق بەهەر نرخێك بێت نەمێنێنتەوە، لەبەرانبەریشدا ژمارەیەكی كەمیش دەیانەوێت ئەمریكا بمێنێتەوە. بەڵام زۆربەی خەڵكی ناوەڕاستی عێراق پێیانوایە دەبێت ئەمریكا لەماوەیەكی دیاریكراو عێراق بەجێبهێڵێت، لەو كاتەی ئەمریكیەكان پرسیار لەعێراقیەكان دەكەن تاچەند پێویستیان بەهێزەكانیان هەیە، ئەوا لە وەڵامدا عێراقیەكان دەڵێن بۆ ماوەی چەند مانگێك یاخود چەند ساڵێك. بەڵام كشانەوەی ئەو هێزانە بەتوندی بە توانای هێزە سەربازیەكان عێراق بۆ پاراستنی ئاسایش بەستراوەتەوە. زۆربەی عێراقیەكان دڵخۆشن بە نەمانی شەڕی ناوخۆ بەڵام ترسیان هەیە دوای رۆیشتنی هێزەكانی ئەمریكا شەڕی ناوخۆ هەڵبگیرسێتەوە، چونكە هێزەكانی عێراق ئەو توانایەیان نییە، هەروەها پرۆسەی سیاسی هیچ پێگەیشتنێكی بەخۆیەوە نەبینیوە كەمتمانەی بەعێراقیەكان بدات كە دوورن لە هەڵگیرسانەوەی شەڕی ناوخۆ، بۆیە زۆربەی عێراقیەكان حەزیان لە نەمانی هێزەكانی ئەمریكایە ‌و ترسیشیان لەرۆیشتنی هەیە.
 دوا خاڵیش كە پۆلاك بە ئەفسانەی ناوبردووە، فەلسەفەی وەستانی شەڕە،  ئەو لە خاڵی پێنجەم دا دەنوسێ‌"هیچ شەڕێك بەپێی ئەو بەرنامەیەی دانراوە ناڕوات. تەنانەت لەشەڕە هەر سەركەوتوەكانیشدا وەكو شەڕی كەنداو، كاریگەری خراپی ئەو جەنگە هەتا ماوەیەكی زۆر دەمێنێت، بۆیە شەڕ پێویستە بەپێی بەرنامە كۆتایی بێت، دەخوازین ئیدارەی ئۆباما لە عێراقدا سەركەوتووبێت، چونكە ئەگەر لەسەرەتای كارەكانی ئۆباما سەركەوتوو نەبوو ئەوا بەشكستی ئەمەریكا كۆتای دێت، هەروەك سەرۆك دبلیوبۆش لەئەنجامی شكستەكانیەوە ئەوە فێربوو هەركاتێك شەڕ ڕوویدا ئەوا كۆمەڵێك كێشەو گرفتی چاوەڕوانكراو ڕوودەدات".

© هه‌موو مافه‌كان پارێزراون بۆ Shaqam.Net (هه‌موو مافه‌کان تایبه‌ته‌ به‌م سایته‌.)
کۆپی کردنی بابه‌ته‌کان به‌ هێنانی ناوی سایت و دانانی به‌سته‌ری سه‌رچاوه‌ رێگه‌ پێدراوه‌‌.

نوسراوه‌ له‌ به‌رواری : 2 گه‌لاوێژ ، 2708 (4364 خوێندراوه‌ته‌وه)