ده‌زگای سه‌رده‌م له‌ نێوان به‌رداشی (شوان ئه‌حمه‌د) و به‌رگری نوسه‌ره‌ ڕه‌هه‌ندییه‌كان و  شرۆڤه‌ی خوێنه‌ردا

راپۆرتى: سالار جاف
به‌شى یه‌كه‌م

ده‌زگای سه‌رده‌م دوانزه‌ ساڵ به‌ر له‌ ئێستا وه‌ك ئه‌ندامانی ئه‌نجومه‌نی ئه‌و ده‌زگایه‌ ئاماژه‌ی پێده‌ده‌ن به‌ بڕیاری سه‌رۆكایه‌تی حكومه‌تی هه‌رێمی كوردستان (كه‌ ئه‌و كات سه‌رده‌می دوو ئیداره‌یی بوو‌ یه‌كێتی ئیداره‌ی سلێمانی به‌ڕێوه‌ ده‌برد) دامه‌زراوه‌، ده‌زگایه‌كی نه‌ حوكمیه‌ و نه‌ حیزبی! مانگانه‌یه‌كی بۆ دابین كراوه‌ به‌ بڕی سه‌د ملیۆن دینار، ئه‌وه‌ی شایه‌نی هه‌ڵوه‌سته‌یه‌ حكومه‌تی هه‌رێم چۆن بڕیار له‌سه‌ر كردنه‌وه‌ی ده‌زگایه‌ك ده‌دات كه‌ سه‌ر به‌ خۆی نه‌بێت، یاخود چۆن بودجه‌ ده‌درێت به‌ ده‌زگایه‌ك سه‌ر به‌ هیچ وه‌زاره‌تێكی حكومی نه‌بێت ، و له‌لایه‌ن مام جه‌لال سكرتێری یه‌كێتی نیشتمانی كوردستانه‌وه‌ مانگانه‌ ده‌هه‌زار دۆلار ده‌درێت به‌  شه‌خسی شێركۆ بێكه‌س  به‌رپرسی ده‌زگاكه‌، ئه‌م ده‌زگایه‌ خاوه‌نی شه‌ش گۆڤاره‌ له‌ ئێستادا و سه‌دوبیست كارمه‌ند به‌ڕێوه‌ی ده‌به‌ن و  له‌ سه‌دا شه‌ستی ئه‌و مینحه‌یه‌ موچه‌ی ئه‌وانه‌ .،، جگه‌ له‌مه‌ش ئه‌ركی كتێب چاپكردن و وه‌رگێڕانی نوسین له‌ ئه‌ستۆ ده‌گرن، ئه‌م ده‌زگایه‌ ناوه‌ ناوه‌ هه‌ندێك باسی تازه‌ی له‌ باره‌وه‌ ده‌بیسترێت به‌ڵام هه‌ر زوو كپ ده‌بێته‌وه‌ و بارودۆخه‌كه‌ هێمن ده‌بێته‌وه‌ ،ئه‌مه‌ش له‌وانه‌یه‌ بۆ ئه‌وه‌ بگه‌رێته‌وه‌ كه‌س ناوێرێت به‌ شێوه‌یه‌كی تێر و ته‌سه‌ل باس له‌ نهێنیه‌كانی ناوه‌نده‌ ڕۆشنبیریه‌كان بكات ، به‌ هۆی ئه‌وه‌ی هه‌ر زوو وه‌ڵام ده‌درێنه‌وه‌ و بێده‌نگ ده‌كرێن ئه‌گه‌ر له‌ به‌رامبه‌ردا تاوانباریش نه‌كرێن، چونكه‌ ئه‌و ڕۆشنبیرانه‌ی له‌و ناوه‌ندانه‌دا كار ده‌كه‌ن به‌ هۆی ناوبانگیانه‌وه‌ لای جه‌ماوه‌ر هه‌رزوو باوه‌ڕیان پێده‌هێنرێت و  له‌ هه‌موو ده‌زگایه‌كیشه‌وه‌ ده‌توانن په‌یامه‌كانیان بگه‌یه‌نن.  له‌ ماوه‌ی ڕابردودا له‌ لایه‌ك به‌ هۆی وه‌ستاندنی گۆڤاری (سه‌رده‌می ڕه‌خنه‌) له‌ لایه‌كی تر ڕاپۆرتێكی دیوانی چاودێری دارایی، كه‌ ئه‌م دوانه‌ كه‌ف و كوڵێك بون و زوو دامركانه‌وه‌، به‌ڵام به‌م دواییه‌ یه‌كێك له‌ كارمه‌نده‌كانی (شوان ئه‌حمه‌د) كه‌ به‌ڕێوبه‌ری نوسینی گۆڤاری (سه‌رده‌م ) بوو له‌و ده‌زگایه‌ هاته‌ ده‌ره‌وه‌و له‌ كۆمه‌ڵه‌ وتارێكدا له‌ ڕۆژنامه‌ و سایته‌كاندا هه‌ندێك نهێنی بڵاوكرده‌وه‌ كه‌ خه‌ڵكی كوردستان و به‌ تایبه‌تی چینی خوێنه‌رای توشی شۆك كرد ، به‌ڵام هه‌ر زوو له‌ لایه‌ن ده‌زگای سه‌رده‌م و سێ نوسه‌ر و رۆشنبیری تری ڕه‌هه‌ندی (به‌ختیار عه‌لی، ئاراس فه‌تاح، ڕێبین هه‌ردی ) وه‌ڵامی درایه‌وه‌و چه‌ند نوسه‌رێكی تریش لێره‌و له‌وێ به‌ بۆچونی جیاجیاوه‌ وه‌ڵامی هه‌ردولایان دایه‌وه‌، كه‌ هێشتا هه‌موو ڕاستیه‌كان به‌ ته‌واوی ڕون نه‌بونه‌ته‌وه‌.

وردبونه‌وه‌یه‌ك له‌ كه‌سایه‌تی و ڕابردووی هه‌ردوو نوسه‌رو ڕۆشنبیر (شێركۆبێكه‌س و شوان ئه‌حمه‌د)

شێركۆ بێكه‌س؟

شێركۆ بێكه‌س ئه‌گه‌ر بخوازین وردبونه‌وه‌یه‌ك له‌ سه‌ر ژیانی بكه‌ین له‌وانه‌یه‌ كاتێكی تاقه‌ت پروكێن و تواناو شاره‌زاییه‌كی بوێت له‌سه‌ر ژیانی، چونكه‌ هه‌ركه‌سێك به‌ هیوای شتێكی له‌و بابه‌ته‌ بێت ناتوانێت ته‌نها هه‌لسه‌نگاندن بۆ ژیانی شاعیرێكی ناودار بكات، به‌ڵكو ده‌بێت ڕوه‌كه‌ی تریشی له‌ بیر نه‌كرێت كه‌ سیاسیه‌كی تاڕاده‌یه‌ك ئیزدیواجیه‌، شێركۆ بێكه‌س به‌ هۆی بێكه‌سی باوكیه‌وه‌ كه‌ یه‌كێك بووه‌ له‌ شاعیره‌ ناودار و به‌ تواناكانی سه‌ده‌ی پێشوتری كوردستان زوو ئاشنایه‌تی له‌گه‌ڵ شیعر و ئه‌ده‌ب و نوسیندا په‌یدا كردووه‌ ، خاوه‌نی چه‌ندین به‌رهه‌می دانسقه‌ و به‌پێزی ئه‌ده‌بیه‌ و یه‌كێكه‌ له‌ داهێنه‌رانی رێبازی نوێی شیعری له‌ كوردستاندا، له‌ ئێستادا به‌رهه‌مه‌كانی له‌ توێی هه‌شت به‌رگدا كه‌ له‌ وڵاتی سوید چاپكراوه‌ و له‌ كتێبخانه‌كانی كوردستاندا هه‌یه‌ كۆكراوه‌ته‌وه‌، كه‌ نرخی كۆبه‌رهه‌مه‌كه‌ی تاڕاده‌یه‌ك زۆره‌و هه‌موو خوێنه‌رێكی كورد ناتوانێت به‌ ده‌ستی بێنێت، به‌م كۆمه‌ڵه‌ ده‌سته‌واژه‌ ده‌توانین بڵێین ئه‌م شاعیره‌ تاڕاده‌یه‌ك به‌ خوێنه‌ر ناسێنراوه‌، به‌ڵام له‌ ڕووه‌كه‌ی تره‌وه‌ كه‌ گه‌مه‌ی سیاسی و ڕۆڵی شێركۆ بێكه‌سه‌ له‌و گه‌مه‌دا ناتوانین هه‌روا زوو تێفكرینێك بۆ ئه‌م ڕۆشنبیره‌ی كورد بكرێت به‌ڵكو ده‌بێت له‌ مێژویه‌كی دووری شێركۆ بێكه‌سه‌وه‌ ده‌ستپێبكه‌ین و هه‌موو سه‌ره‌ داوه‌كان گرێبده‌ینه‌وه‌ پێكه‌وه‌ هه‌تا ئه‌م شێركۆ بێكه‌سه‌ی ئه‌مڕۆ دروستده‌كرێت.
شاعیر و ڕوناكبیر شێركۆ بێكه‌س له‌ته‌مه‌نێكی گه‌نجێتیه‌وه‌ تێكه‌ڵی سیاسه‌ت بووه‌ ، ئه‌و له‌ ته‌مه‌نی لاویدا بووه‌ كه‌ وه‌ك ده‌روێشێكی شۆڕشه‌كه‌ی بارزانی ده‌ركه‌وتووه‌ و به‌ شیعره‌كانی جوانیه‌كانی ئه‌و شۆڕشه‌ی داوه‌ به‌ گوێی خوێنه‌ر و جیلی ڕۆشنبیری ئه‌وكاتی كوردستاندا، خاوه‌نی كۆمه‌ڵێك ده‌سته‌واژه‌یه‌ كه‌ ئه‌گه‌ر خوێنه‌رێك ڕێی لێبكه‌وێت و ئێستای بێكه‌س نه‌ناسێت له‌وانه‌یه‌ بگات به‌و بۆچونه‌ی كه‌ ئه‌م شاعیره‌ش بووه‌ به‌ قوربانیه‌كی ئه‌و شۆڕشه‌ و له‌گه‌ڵ نه‌مانی ئه‌و شۆڕشه‌دا یان ماڵئاوایی له‌ ژیان كردووه‌ به‌ شێوه‌ ته‌قلیدیه‌كه‌ی، یان بۆ یه‌كجاری وازی له‌ قه‌ڵه‌م هێناوه‌، چونكه‌ نوسه‌رێك كه‌ زیاتر به‌ چاوێكی ئه‌قڵه‌وه‌ له‌ ده‌وروبه‌ره‌كه‌ی ورد ده‌بێته‌وه‌ دره‌نگتر باوه‌ڕ به‌ شۆڕشێك یان ڕاپه‌ڕینێك یان سه‌رهه‌لدانێك ده‌هێنێت له‌ چاو كه‌سانێكی ئاسایدا، چونكه‌ ئه‌و توانای بیركردنه‌وه‌ی زیاتره‌ و زۆرتر به‌ دوای خاسیه‌ته‌كانی ئه‌و تازه‌ ده‌ركه‌وته‌دا ده‌گه‌ڕێت، جا ئه‌گه‌ر هاتوو باوه‌ڕپێهێنان گه‌شته‌ ڕاده‌ی به‌سه‌ردا گوتن ئیتر جۆره‌ ڕه‌هایه‌تیه‌ك وه‌رده‌گرێت، كه‌ به‌ ته‌ماشاكردنی چه‌ند دێڕێكی كه‌می شێركۆ بێكه‌س ئه‌و ڕاستیه‌ روونده‌بێته‌وه‌:
(ئه‌مانه‌وێی
وه‌ك گولله‌ بۆ چه‌كه‌كانمان ئه‌مانه‌وێی
وه‌ك پێشمه‌رگه‌  بۆ كه‌ژو كێوه‌كانمان
ئه‌مانه‌وێی
وه‌ك باران بۆ كێڵگه‌كانمان ئه‌مانه‌وێی
هه‌ر بۆ مه‌رگ نامانه‌وێی
ئه‌ی بارزانی..
  شێركۆ بێكه‌س)
به‌ڵام ئه‌وه‌ی جێگه‌ی ڕامان‌و هه‌ڵچون و داچون و بازبازێنی ئه‌م شاعیره‌یه‌ ، یانی زۆربه‌ی له‌گه‌لدابوونه‌كانی له‌وكاتانه‌دا بووه‌ كه‌ لایه‌نی به‌رامبه‌ر له‌ لوتكه‌ یاخود شتێك خواروتر بووه‌، هه‌میشه‌ لێزانانه‌ به‌دیلی دووه‌م و ماڵی دووه‌می سیاسه‌تی هه‌بووه‌، كارزانانه‌ دركی به‌وه‌‌ كردووه‌ كه‌چی كاتێك به‌رامبه‌ر و درێژه‌پێدانی ئه‌میش له‌ به‌رامبه‌ردا بێ سود ده‌بێت، چونكه‌ له‌ دوای جیا بونه‌وه‌ی بالی مه‌كته‌ب سیاسی پارتی ئه‌م شاعیره‌ هه‌ستی به‌وه‌كردووه‌ كه‌ هێشتا هێز و گه‌ل لای بارزانیه‌ و مینبه‌ری ناساندنی ئه‌میش هه‌مان مینبه‌ره‌ به‌ توندی كه‌وتۆته‌ لێدان وناشرینكردن و ڕسواكردنی باڵی مه‌كته‌ب سیاسی، ناوی به‌كره‌جۆ كه‌ شوێنی نیشته‌جێبوونی ئه‌و باڵه‌ بووه‌ وه‌ك سه‌رچاوه‌ی ئازار و نه‌هامه‌تی بۆ كورد وه‌سف كردووه‌، به‌ڵام ئه‌مانه‌ زۆر ناخایه‌نن و دوای چه‌ند ساڵێك كه‌ شۆڕشی ئه‌یلول توشی تیاچون ده‌بێت و باڵی مه‌كته‌بى سیاسی یه‌كێتی نیشتمانی كوردستان دروستده‌كه‌ن و ده‌گه‌ڕێنه‌ وه‌ شاخه‌كان و له‌لایه‌ن دانیشتوانی كوردستانه‌وه‌ كه‌ به‌ جێگره‌وه‌ی شۆڕشی ئه‌یلولیان ده‌زانی چونكه‌ له‌وكاته‌دا پارتی له‌ حاڵه‌تی متبوندا بوو له‌ دیوی ئێران و ئاماده‌كاری ده‌كرد بۆ هه‌ڵگیرساندنه‌وه‌ی شۆڕشێكی تر، شێركۆ بێكه‌س له‌گه‌ڵ دوژمنه‌كانی دوێنێی و دۆسته‌كانی ئه‌مڕۆیدا نزیك ده‌بێته‌وه‌ و دوای تێپه‌ربوونی كات به‌هه‌مان تاس و حه‌مامه‌وه‌ ئه‌ده‌به‌كه‌ی تێكه‌ڵی ئاراسته‌ سیاسیه‌كه‌ی ده‌كات و ده‌یخاته‌ خزمه‌تی ئه‌م شۆڕشه‌ نوێیه‌، به‌ جۆرێك تێكه‌ڵ ده‌بێت هه‌روه‌ك چۆن له‌ ڕابردوودا بوبو به‌ هێرشبه‌ری ئه‌ده‌بی له‌ هه‌مبه‌ر  به‌كره‌‌جۆدا له‌مكاته‌شدا ڕوی تۆپه‌كه‌ ده‌سوڕێنێت و ڕوی ده‌كاته‌ گۆڵی دۆستی دوێنێ و دوژمنی نوێ و  به‌ پیسترین و ناشرینترین ده‌سته‌واژه‌ ڕوبه‌ڕوی بنه‌ماڵه‌ی بارزانی ده‌بێته‌وه‌:
( ئێوه‌ ئه‌ی گه‌وره‌ پیاوینه‌
پیاوانی دز ، پیاوانی پووت
چاومان لێیه‌
له‌ ناو لنگی تارانه‌وه‌ سه‌ر ده‌ردێنن
له‌گه‌ڵ خۆتانا وه‌ك جانتای ڕه‌شی ده‌ستتان
ئوتێل ئوتێل، شه‌قام شه‌قام
ڕوزه‌ردیتان ئه‌گه‌ڕێنن..
 شێركۆ بێكه‌س)
(ئه‌رده‌ڵان به‌كر) له‌ كتێبێكیدا به‌ناوی (خه‌باتی پێشمه‌رگایه‌تی یان كاره‌سات و ماڵوێرانی) ئاماژه‌ به‌وه‌ ده‌دات كه‌" كه‌س هێنده‌ی شێركۆ بێكه‌س شیعری بۆ بارزانی نه‌نوسی كه‌چی دوای هه‌ره‌سهێنانی شۆڕشه‌كه‌ی كه‌‌وته‌ دژایه‌تی خۆی و حزبه‌كه‌ی" شێركۆ بێكه‌س به‌و جۆره‌ له‌گه‌ڵ یه‌كێتیدا به‌ شێوه‌یه‌ك تیكه‌ڵ ده‌بێت كه‌ ده‌بێت به‌ كارتی ئاماده‌ بووی ئه‌م حزبه‌ له‌ رووی ئه‌ده‌بیه‌وه‌ بۆ ڕوبه‌ڕوبونه‌وه‌ی ناحه‌زه‌كانی و نابوتكردنیان له‌ ڕێی شیعره‌كانیه‌وه‌، ته‌نانه‌‌ت دوای ڕاپه‌ڕینی گه‌لی كوردستان و دروستبوونی شه‌ری ناوخۆ له‌ نێوان بزوتنه‌وه‌ی ئیسلامی كوردستانى ئه‌وكات و یه‌كێتی نیشتمانی كوردستان ، ئه‌م شاعیره‌ به‌ خه‌ستی كه‌وته‌ لێدانی چه‌مك و پیرۆزیه‌ ئیسلامیه‌كان و زیاترین ده‌سته‌واژه‌ی دژه‌ ئیسلامی له‌ ناو به‌رهه‌مه‌كانیدا جێگه‌ كرده‌وه‌ كه‌ ئه‌مه‌ بووه‌ هۆی ئه‌وه‌ی ئه‌ م شاعیره‌ ئێستاشی له‌ گه‌ڵدا بێت له‌ ناو هه‌ندێك خانه‌واده‌ی كوردیدا گوێ لێگرتنی خه‌تی سور بێت و به‌ هیچ شێوه‌یه‌ك گوێ ڕانه‌دێرن له‌ به‌رهه‌مه‌كانی، یه‌كێتیش له‌ به‌رامبه‌ر ئه‌مه‌دا ده‌ستخۆشی پراكتیكیانه‌ی لێكردووه‌ و به‌جۆرێك كه‌ هه‌ر له‌سه‌رده‌می شاخدا به‌ره‌و ئه‌وروپا به‌ ڕێیان كردووه‌ و له‌ دوای ڕاپه‌رینیش ڕاگه‌یاندنه‌كانی حزبه‌كه‌یان خستۆته‌ خزمه‌تی به‌رهه‌مه‌كانی و ڕۆڵێكی كاریگه‌ریان هه‌بووه‌ له‌ ناساندنی به‌خوێنه‌ر وبیسه‌ری كورد و چه‌ندین پۆست و پاداشتیان داوه‌تی وه‌ك ( كردنه‌وه‌ی ده‌زگایه‌كی گه‌وره‌ی ڕۆشنبیری له‌ سه‌رده‌می ئیداره‌ی سلێمانی حكومه‌تدا به‌ ناوی سه‌رده‌مه‌وه‌و دانانی به‌به‌رپرسی ئه‌و ده‌زگایه‌، هه‌زاروچوارسه‌دا مه‌تر زه‌وی له‌ به‌رامبه‌ر پۆسته‌كانی ئه‌ندامی فه‌خری سه‌ركردایه‌تی و وه‌زیرو ئه‌ندام په‌رله‌مانی خانه‌نشین) كه‌ شوان ئه‌حمه‌د له‌ نوسینه‌كه‌یدا ئاماژه‌ی به‌وانه‌ داوه‌، جگه‌ له‌مه‌ش هه‌ر ئه‌م حزبه‌و كه‌سایه‌تیه‌كانی چه‌ندین پاداشتی تاكه‌كه‌سی تریان پێداوه‌ وه‌ك چاپكردنی به‌رهه‌مه‌كانی . پێدانی مانگانه‌یه‌كی ده‌هه‌زار دۆلاری له‌لایه‌ن تاڵه‌بانیه‌وه‌ به‌شه‌خسی شێركۆ بێكه‌س، به‌ڵام شێركۆ بێكه‌س ئه‌وه‌ نه‌بێت به‌ پێدانی ئه‌م هه‌موو پاداشته‌ش هێشتا بیرۆكه‌ كۆنه‌كه‌ی له‌ بیر كردبێت كه‌ دۆزینه‌وه‌ی ماڵی دووه‌م و ئاماده‌كاری به‌دیله‌كه‌یه‌، ئه‌وه‌تا دوای دروستبوونی ئۆپۆزسیۆن و دروستبوون و به‌هێزبوونی میدیای ئازاد و سه‌ربه‌خۆ به‌شێوه‌یه‌كی دیار له‌ كوردستان، شێركۆ بێكه‌س لێزانانه‌ خۆی گونجاندووه‌ له‌گه‌ڵ ئه‌م بارودۆخه‌دا و خۆی نزیكردۆته‌وه‌ له‌م ئاله‌ته‌ تازیه‌ش، وه‌ك تێكه‌ڵبوونی به‌ خۆپیشاندانه‌كان و نوسین بۆ شه‌هیده‌كانی قه‌ڵه‌م و نوسین و دیمانه‌  له‌ڕۆژنامه‌ ئۆپۆزسیۆنه‌كاندا ، چونكه‌ كه‌سێكی وه‌ك شێركۆ بێكه‌س ئه‌یتوانی ساڵانی پێشوش تێكه‌لی جه‌ماوه‌ر بێت به‌ڵام ئه‌مه‌ له‌ لایه‌ن ئه‌وه‌وه‌ نه‌بینرا هه‌تا دوای به‌هێز بوون و گه‌شه‌كردنی ما‌ڵی دووه‌م.

شوان ئه‌حمه‌د؟
شوان ئه‌حمه‌د سه‌رده‌مانێك له‌ ده‌زگای سه‌رده‌م كارمه‌ند بووه‌ و به‌ڕێوبه‌ری نوسینی (سه‌رده‌می ڕه‌خنه‌) بووه‌، جگه‌ له‌وه‌ی یه‌كێكه‌ له‌ نوسه‌ره‌كانی ناو ده‌زگاكه‌، ناتوانرێت بوترێت شوان كارمه‌ندێكی ته‌واو پشتگوێخراوی ده‌زگای سه‌رده‌مه‌ چونكه‌ مانگانه‌ جگه‌ له‌وه‌ی موچه‌ی خۆی به‌ بڕی (هه‌شتسه‌دو په‌نجا هه‌زار دینار) وه‌رگرتووه‌ زه‌وییه‌كیشی به‌ ڕوبه‌ری (سه‌دوشه‌ست مه‌تردوجا)‌ وه‌رگرتووه‌. ئه‌وه‌ی جێگه‌ی ئاماژه‌یه‌ شوان ئه‌حمه‌د مێژووی گه‌نده‌لیه‌كان ده‌گێڕێته‌وه‌ بۆ چه‌ند ساڵێك پێش ئیستا  كه‌ ئه‌وكات خۆشی به‌شێك بووه‌ له‌و ده‌زگایه‌، به‌ڵام وه‌ڵامه‌كه‌ی له‌مكاته‌دایه‌ كه‌ له‌و ده‌زگایه‌ نه‌ماوه‌، كاتێك په‌یوه‌ندی ئه‌و و ده‌زگای سه‌رده‌م گه‌شتۆته‌ ئاستی پچران ئه‌وجا هاتووه‌و نهێنیه‌كان ئاشكرا ده‌كات، ئه‌مه‌ جگه‌ له‌وه‌ی كه‌ ده‌ڵێت چه‌ند جارێك به‌ براده‌رانم وتووه‌ با بێده‌نگ نه‌بین به‌ڵام به‌هۆی ئه‌وه‌ی له‌لایه‌ن (ڕێبین هه‌ردی و شاهۆ سه‌عید) پێی ده‌وترێت گه‌نده‌ڵی گه‌وره‌تر هه‌یه‌ ڕوبه‌ڕوی ببنه‌وه‌ سه‌ره‌نجام بێده‌نگ بووه‌، دوای بڵاوكردنه‌وه‌ی گه‌نده‌ڵیه‌كانیش هه‌ندێك بابه‌تی وروژاندووه‌ كه‌ له‌ ده‌ره‌وه‌ی چوارچێوه‌ی باسه‌كه‌دایه‌، خاڵی ده‌ستپێكردنی كێشه‌كان كه‌ له‌ لایه‌ن ئه‌ندامانی ده‌زگای سه‌رده‌مه‌وه‌ ڕونكرایه‌وه‌ و شوان ئه‌حمه‌دیش له‌ دوره‌وه‌ دانی نا به‌ هه‌ندێكیاندا له‌ گرنگی بابه‌ته‌كه‌ی كه‌مكرده‌وه‌ ،به‌وه‌ی كه‌ شوان به‌ هۆی زیادوكه‌می پاداشته‌وه‌ بارودۆخه‌كه‌ی گه‌یانده‌ ئاستی لێكپچڕان و ده‌نگهه‌ڵبڕین، ئه‌گه‌ر شوان ئه‌حمه‌د له‌ كاتێكدا ئه‌م نوسینانه‌ی بڵاو بكردایه‌ته‌وه‌ كه‌ هیچ ناكۆكیه‌ك له‌ نێوان ئه‌و و سه‌رده‌مدا نه‌بوایه‌ بێگومان هێنده‌ی تر گرنگ ده‌هاتنه‌ به‌رچاو.

به‌ڵگه‌كانی(شوان ئه‌حمه‌د) له‌ نێوان به‌ر ئه‌نجام و به‌رپه‌رچدانه‌وه‌دا
هه‌ر دوای بڵاوبونه‌وه‌ی هه‌ندێك به‌ڵگه‌ له‌لایه‌ن شوان ئه‌حمه‌دی به‌رێوبه‌ری نوسینی پێشوتری گۆڤاری (سه‌رده‌م) كه‌ پشتیان به‌ڕاپۆرتێكی دیوانی چاودێری به‌ستووه‌  كه‌ دوو ساڵ پێش ئێستا ئاراسته‌ی ده‌زگای سه‌رده‌می كردووه‌، كه‌ دیارترینیان دۆسیه‌یه‌كی (هه‌لۆ شێركۆ بێكه‌س)ه‌ له‌سه‌ر كڕینی ئا‌مێرێكی چاپ له‌گه‌ڵ نامه‌یه‌كی تایبه‌تی به‌رپرسی ده‌زگای سه‌رده‌م كه‌ ئاراسته‌ی (جه‌لال سام ئاغا) به‌رپرسی ئه‌و دیوانه‌ی كردووه‌ و شێوه‌ی سه‌رفكردنی هه‌ندێك پاره‌ی سه‌رده‌می له‌خۆ گرتووه‌ كه‌ ناڕوونن ، شوان ئه‌حمه‌د باس له‌ چۆنێتی سه‌رفكردنی پاره‌كانی ده‌زگای سه‌رده‌م ده‌كات وشێركۆ بێكه‌س به‌وه‌ تاوانبار ده‌كات كه‌ به‌پێی میزاجی خۆی پاداشته‌كه‌ی تاڵه‌بانی سه‌رف كردووه‌ و ناڕونی له‌ سه‌رفكردنه‌كه‌یدا هه‌یه‌، هه‌ندێك ئه‌ندامی تری ئه‌نجومه‌نی به‌ڕێوه‌بردنی ده‌زگای سه‌رده‌م به‌وه‌ تاوانبار ده‌كات كه‌ پاره‌یان بۆ پێداویستی تایبه‌تی خۆیان له‌ سه‌رده‌م وه‌رگرتووه‌ وه‌ك گه‌شتكردنی ده‌ره‌وه‌ی وڵات و كڕینی شتومه‌كی ناوماڵ له‌لایه‌ن (شێركۆبێكه‌س و هه‌ڵكه‌وت عه‌بدوڵڵا) وه‌.  له‌ لایه‌كی تره‌وه‌ زۆر به‌ڕوونی باسی ده‌وامنه‌كردنی شێرزاد حه‌سه‌ن ده‌كات و، ئه‌وه‌ ده‌خاته‌ڕوو كه‌ تائێستاش شوێنێك له‌ سه‌رده‌مدا نیه‌ بڵێین ئه‌وه‌ شوێنی ده‌وامی شێرزاد حه‌سه‌نه‌ به‌ڵكوو به‌ ته‌له‌فۆنێك دێت موچه‌كه‌ی وه‌رده‌گرێت و ده‌ڕوات، هه‌ر دوابه‌دوای بڵاوبونه‌وه‌ی هه‌واڵه‌كه‌ هه‌رسێ نوسه‌ر و ڕۆشنبیر (به‌ختیار عه‌لی، ئاراس فه‌تاح، ڕێبین هه‌ردی) له‌ ڕونكردنه‌وه‌یه‌كیاندا بۆ ڕۆژنامه‌ی ئاوێنه‌، بڕیاری دوو هه‌فته‌ ڕاگرتنی سه‌رجه‌م گۆشه‌ و نوسینه‌كانیاندا له‌و گۆڤاره‌كه‌دا، له‌ لایه‌كی تره‌وه‌ هه‌رسێ نوسه‌ر ( دلاوه‌ر قه‌ره‌ده‌غی، ئاسۆ جه‌بار، خالید سلێمان) یش ،هه‌ركه‌سه‌و به‌ جیا ڕونكردنه‌وه‌یان داو ڕایانگه‌یاند ناوی ئه‌وان زیاده‌یه‌ له‌و ڕاپۆرته‌دا وهیچ هاوكاریه‌كی له‌و شێوه‌یان وه‌رنه‌گرتووه‌ كه‌ له‌و ڕاپۆرته‌دا هاتووه‌، ئاسۆجه‌بار ئه‌وه‌شی ئاشكرا كرد كه‌ داوای یاسایی له‌سه‌ر شێركۆ بێكه‌سی به‌رپرسی ئه‌‌و ده‌زگایه‌ تۆمار ده‌كات، دوای هه‌فته‌یه‌كیش ده‌زگای سه‌رده‌م به‌شی یه‌كه‌می ڕونكردنه‌وه‌ی خۆیان بڵاوكرده‌وه‌ له‌ هه‌مان ڕۆژنامه‌دا به‌ڵام ئه‌مه‌ دوای ئه‌وه‌ی ڕێگری له‌ (شوان ئه‌حمه‌د ) بۆ بڵاوكردنه‌وه‌ی هه‌موو به‌شه‌كان دروستت بوبو،كه‌ نیگه‌رانی لای خوێنه‌ری كورد دروستكرد به‌وه‌ی ڕێگه‌ نه‌دراوه‌ هه‌موو نهێنیه‌كان بڵاوببنه‌وه‌و ئاگاداری ڕوداوه‌كانی ئه‌و ده‌زگایه‌ بن ، ؛له‌ كاتێكدا ئه‌و سێ نوسه‌ره‌ ئه‌وه‌یان ڕونكرده‌وه‌ هیچ كێشه‌یه‌كیان له‌گه‌ڵ بڵاوكردنه‌وه‌ی گه‌نده‌ڵیه‌كاندا نیه‌، به‌ڵكو شوان ئه‌حمه‌د له‌ ئیتیكی نوسین لایداوه‌و پرسی تاكه‌كه‌سیی تێكه‌ڵ به‌ نوسینه‌كانی كردووه‌"

ڕونكرنه‌وه‌و پشتگیری (به‌ختیار عه‌لی و ئاراس فه‌تاح و ڕێبین هه‌ردی) له‌ ده‌زگای سه‌رده‌م
ئه‌وه‌ی چاوه‌ڕێی نه‌ده‌كرا هاتنه‌ ده‌نگی به‌په‌له‌ی سێ نوسه‌ری دیاری كوردستان بوو، به‌ شێوه‌یه‌ك كه‌نامه‌ی تاوانبارییان ته‌سلیم به‌ ده‌ستی ڕۆژنامه‌ی ئاوێنه‌ كردو هه‌ر له‌هه‌مانكاتیشدا سزاكه‌یان بۆ بڕیه‌وه‌ كه‌ دوو هه‌فته‌ بڵاونه‌كردنه‌وه‌ی بابه‌ت و گۆشه‌كانیان‌ بوو، ئه‌و ڕونكردنه‌وه‌ كورته‌ی ئه‌م سێ نوسه‌ره‌ كه‌ دوای ئه‌وه‌ به‌ ڕۆمانه‌ نوسینێك له‌ سایتی تایبه‌تی نوسه‌ر و ڕۆشنبیر (به‌ختیار عه‌لی) كۆتایی پێهات، به‌ دوو شێوه‌ ده‌بێت لێكدانه‌وه‌ی بۆ بكرێت.
له‌و به‌شه‌یدا كه‌ باس له‌ ئیتیكی نوسین و باسكردنی هه‌ندێك شت كه‌ سومعه‌ی تایبه‌تی كه‌سانی تری پێوه‌به‌نده‌ ئه‌كرێت به‌ شتێكی ڕاست دابنرێت، چونكه‌ شوان ئه‌حمه‌د وتاره‌كه‌ی له‌ ژێر ناوی ئاشكراكردنی گه‌نده‌ڵیدا بڵاوكرده‌وه‌، به‌ڵام ئه‌م باسه‌ په‌لی كێشاو هه‌ندێك بابه‌تی تری وروژاند كه‌ له‌و چوارچێوه‌دا نه‌بوون، ده‌بوایه‌ ئه‌و نوسه‌ره‌ له‌ به‌شێكی ترداو له‌ژێر تایتڵێكی تردا ئه‌و بابه‌تانه‌ی تری بخستایه‌ته‌ به‌ر باسكردن.
به‌ دیوێكی تردا ئه‌و نوسه‌رانه‌ ئه‌بێت به‌ توندی ڕه‌خنه‌یان لێبگیرێت به‌وه‌ی ڕێگه‌یان به‌وه‌گرت  كه‌ شوان ئه‌حمه‌د هه‌موو به‌ڵگه‌كانی تر بڵاوبكاته‌وه‌، ئه‌وان له‌ نوسینه‌كه‌یاندا به‌ ڕونی و بێ په‌رده‌ ئه‌وه‌یان نه‌خسته‌ڕوو كه‌ داوا له‌ شوان ئه‌حمه‌د بكه‌ن له‌سه‌ر نوسینه‌كانی به‌رده‌وام بێت و به‌لگه‌كان ئاشكرا بكات، به‌لكو ئه‌م داوایه‌یان به‌سته‌وه‌ به‌ زه‌مه‌نی رابردوو، به‌ شێوه‌یه‌ك ئه‌م ده‌سته‌واژه‌یان به‌كارهێنا كه‌ ئه‌گه‌ر به‌و شێوه‌ بوایه‌ كێشه‌یان نه‌ده‌بوو نه‌ك بێن و بڵێن ( ئه‌گه‌ر به‌م شێوه‌یه‌ بڵاوی ده‌كه‌یته‌وه‌ به‌رده‌وام به‌) ، جگه‌ له‌مه‌ش سزادانی ڕۆژنامه‌ی ئاوێنه‌ كه‌ خوینه‌رێكی زۆری هه‌یه‌و ئه‌و سێ نوسه‌ره‌ش به‌شێكی گرنگی لاپه‌ڕه‌كانی ئه‌و ڕۆژنامه‌یه‌ن، به‌ڵام به‌هۆی هه‌ڕه‌شه‌ی وه‌ستاندنی گۆشه‌ و نوسینه‌كانیان وایانكرد كه‌ ئه‌و ڕۆژنامه‌ نوسینه‌كانی شوان ئه‌حمه‌د ڕابگرێت، ئه‌گینا ئه‌قڵ نایبڕێت ڕۆژنامه‌ی ناوبراو كه‌ یه‌كێكه‌ له‌ میدیا دیاره‌كانى ئه‌مڕۆى رۆژنامه‌نووسیى كوردى له‌ بێ ئاگایدا نوسینێكی وه‌ها بڵاوده‌كاته‌وه‌ پێش ئه‌وه‌ی لێكدانه‌وه‌ی بۆ بكات ، نه‌خێر به‌لكو ئاوێنه‌ ئه‌بێت هه‌لسه‌نگاندنی بۆ بابه‌تێكی وه‌ها كردبێت ئه‌وجا دایگرتبێت ، ئه‌مه‌ش ئه‌وه‌ ده‌رده‌خات ئه‌وه‌ی ڕێگه‌ی له‌ بڵاوبونه‌وه‌ی ئه‌و نوسینانه‌ گرت ئه‌و سێ نوسه‌ره‌ ڕه‌هه‌ندیه‌ بوون نه‌ك ئاوێنه‌، جگه‌ له‌مانه‌ش پێشكه‌وتنی ڕونكرنه‌وه‌ی ئه‌م سێ نوسه‌ره‌ له‌چاو ده‌زگای سه‌رده‌مدا كه‌ خاوه‌نی یه‌كه‌می دۆسیه‌كه‌یه‌ گومانێكی تر دروستده‌كات به‌وه‌ی كه‌ ئه‌مانیش ترسیان هه‌بێت له‌ به‌شه‌كانی تردا ناویان بهێنرێت و شتگه‌لێكیان له‌سه‌ر بوترێت كه‌ ئه‌م سێ نوسه‌ره‌ حه‌ز به‌ بڵاوبونه‌وه‌ی نه‌كه‌ن، هه‌رچه‌نده‌ ئه‌مه‌ له‌لایه‌ن ئه‌‌م سێ نوسه‌ره‌وه‌ ڕونكرایه‌وه‌ كه‌ هیج نهێنیه‌كیان نیه‌ ترسیان لێی هه‌بێت، به‌ڵام شوان ئه‌حمه‌د له‌ به‌شه‌كانی دوای ئه‌م ڕونكردنه‌وه‌دا كه‌م تا زۆر ناوی ئه‌مانیشی هێنا، به‌شێكی تری نوسینه‌كانی ئه‌م سێ نوسه‌ره‌ خالێكه‌ له‌و خاڵه‌ گرنگانه‌ی كه‌ خوێنه‌ری كورد بێتاقه‌ت و په‌ست و توڕه‌ ده‌كات، ئه‌ویش ده‌رخستنی ڕه‌گی خۆبه‌زلزانین و له‌ به‌رامبه‌ردا كه‌سانی تر به‌ گه‌مژه‌ و جاهیل و نه‌زان و ته‌سكبین و كاڵفام وێناكردن، ئه‌وان ئه‌وه‌یان خسته‌ڕوو كه‌ نابێت له‌ ڕۆژنامه‌یه‌كدا كه‌ ئه‌مان تێیدا ده‌نوسن بابه‌تی له‌وشێوه‌ بڵاوبكرێته‌وه‌، جێگه‌ی سه‌رسوڕمانه‌!! كۆت و به‌ند بۆ ڕۆژنامه‌یه‌ك دروستبكه‌یت كه‌ لێی ده‌نوسیت، كه‌سێك به‌ جاهیل و نه‌زان بزانیت و وه‌ڵامی بده‌یته‌وه‌!! چه‌ندین بابه‌تت بۆ ڕۆژنامه‌یه‌ك نوسیبێت و نه‌زانیت توانای كاركردنی چۆنه‌!! ئه‌وه‌ی له‌گه‌ڵ بیركردنه‌وه‌ی تۆدا یه‌كنه‌گرێته‌وه‌ مافی بڵاوكردنه‌وه‌ی نوسینه‌كانی نه‌بێت، مافی بڕیاردان له‌ ستافی ڕۆژنامه‌یه‌ك بسێنیته‌وه‌و به‌ كارتی گوشار خۆت بكه‌یت به‌ بڕیارده‌ری ئه‌و ڕۆژنامه‌یه‌!!

وه‌ڵامی ده‌زگای سه‌رده‌م
له‌ ژماره‌كانی دواتردا ده‌زگای سه‌رده‌م به‌ هه‌مان زنجیره‌ وه‌ڵامێكی دوو به‌شی شوان ئه‌حمه‌دیان دایه‌وه‌و له‌هه‌مان ڕۆژنامه‌دا بڵاوكرایه‌وه‌، ئه‌و تۆمه‌تانه‌ی كه‌ درابووه‌ پاڵ ده‌زگاكه‌ زۆرینه‌یان ڕه‌تكرانه‌وه‌و شوان ئه‌حمه‌‌دیان به‌ كارمه‌ندێكی به‌رژه‌وه‌ندخوازو بێ ئیلتیزام ناوبرد. له‌و وه‌ڵامه‌دا ئه‌وه‌یان خستبووه‌ ڕوو كه‌ شوان به‌ هۆی كێشه‌یه‌كی تایبه‌تیه‌وه‌ له‌ سه‌رده‌م ڕۆشتووه‌ ئه‌گینا هۆكاری گه‌نده‌ڵی و به‌رژه‌وه‌ندی گشتی تیانه‌بووه‌، به‌ڵگه‌شیان بۆ ئه‌مه‌ (بۆچى شوان ئه‌حمه‌د چه‌ند ساڵه‌ نه‌هاتۆته‌ ده‌نگ و له‌مكاته‌دا ده‌ستی كردووه‌ به‌ بڵاوكردنه‌وه‌ی ڕاپۆرته‌ كۆنه‌كانی دیوانی چاودێری دارایی؟) جگه‌ له‌مه‌ش هه‌مان گله‌یی سێ نوسه‌ره‌ ڕه‌هه‌ندیه‌كان دوباره‌ كرایه‌وه‌ كه‌ نوسه‌ری ئه‌و بابه‌ته‌ له‌ ئیتیكی نوسین ده‌رچووه‌و نابێت به‌و زمانه‌ بۆچونه‌كانی ده‌رببڕێت. له‌ لایه‌كی تره‌وه‌ ئه‌وه‌یان باسكردووه‌ كه‌ شوان ئه‌حمه‌دیش وه‌ك هه‌ر كه‌سێكی تری ناو سه‌رده‌م موسته‌فید بووه‌و موچه‌ی باشی وه‌رگرتووه‌ ، جگه‌ له‌وه‌ی گله‌یی ئه‌وه‌شیان كردووه‌ كه‌ شوان ئه‌حمه‌د كارمه‌ندێكی باش نه‌بووه‌و ده‌وامی خۆی به‌باشی نه‌كردووه‌، له‌لایه‌كی تره‌وه‌ به‌ توندی ڕه‌خنه‌ له‌ شوان ئه‌حمه‌د ده‌گرن كه‌ باسی ئه‌وه‌ی نه‌كردووه‌ بۆ ئه‌م پارانه‌ سه‌رف كراون بۆ سه‌فه‌ری ده‌ره‌وه‌ی ئه‌و ئه‌ندامانه‌ی سه‌رده‌م، له‌به‌شی دووه‌می ڕونكردنه‌وه‌كه‌ی سه‌رده‌م دا ئه‌وه‌ هاتووه‌ كه‌ (له‌سه‌ره‌تای‌ ساڵى دووهه‌زاردا بێگه‌رد‌و چه‌ند براده‌رێكی‌ ده‌زگا دوو ساڵ‌ بۆ پێشانگای‌ كتێب چوون بۆ تاران، بۆ ماوه‌ی‌ نزیكه‌ی‌ هه‌فته‌یه‌ك له‌ به‌یانیه‌وه‌ تا ئێواره‌ له‌ پێشانگا نێوده‌وڵه‌تیه‌ گه‌وره‌كه‌ی‌ تاراندا كتێبیان بۆ كتێبخانه‌ی‌ ده‌زگا كڕیوه‌، بێگومان بۆ خۆشیان هه‌ر كڕیوه‌، له‌ تارانه‌وه‌ به‌كارتۆن‌و گونیه‌ كتێبیان گه‌یاندۆته‌ سلێمانی‌‌و له‌ ڕێگا‌و نێوان ئوتێل‌و پێشانگادا بێجگه‌ له‌ بارهه‌ڵگری‌ چیتریان بۆ نه‌ماوه‌ته‌وه‌)

قوڵبونه‌وه‌ی كێشه‌كان و هه‌ڕه‌شه‌ كردن!!
دوای چه‌ند ڕۆژێك تێپه‌ڕین به‌سه‌ر نوسینه‌كانی شوان ئه‌حمه‌د له‌سه‌ر گه‌نده‌ڵیه‌كانی ده‌زگای سه‌رده‌م. سه‌نته‌ری میترۆ هه‌والێكی ده‌رباره‌ی هه‌ڕه‌شه‌ی كوشتن به‌رامبه‌ر شوان ئه‌حمه‌د له‌لایه‌ن موقه‌ده‌م (ئاری ڕه‌ئوف بڵاوكرده‌وه‌ ، ئاری ڕه‌ئوف كه‌ كوڕی نوسه‌ر و ڕوناكبیر ڕه‌ئوف بێگه‌رده‌و باوكی یه‌كێكه‌ له‌وانه‌ی كه‌ شوان ئه‌حمه‌د له‌ نوسینه‌كانیدا باسی كردووه‌، موقه‌ده‌م ئاری بێ ئاگایی خۆی ده‌ربڕی له‌وه‌ی كه‌ هه‌ره‌شه‌ی كوشتنی له‌ شوان ئه‌حمه‌د كردبێت به‌ڵام په‌یوه‌ندی پێوه‌كردنی به‌ مۆبایل ڕه‌تنه‌‌كردبوه‌وه‌‌ ، له‌ به‌رامبه‌ردا شوان ئه‌حمه‌د داوایه‌كی یاسایی له‌ سه‌ر تۆمار كرد به‌ تۆمه‌تی ئه‌وه‌ی پێی وتوه‌، ئه‌گه‌ر باوكی به‌ قه‌ڵه‌م وه‌ڵامی ده‌داته‌وه‌ ئه‌و به‌ فیشه‌ك وه‌ڵامی شوان ئه‌حمه‌د ده‌داته‌وه‌ كه‌ ئه‌مه‌ش به‌مانای هه‌ڕه‌شه‌ی كوشتن دێت، ئه‌م كاره‌ی ئاری ڕه‌ئوف نیگه‌رانی ئه‌و كه‌سانه‌ی به‌دوای خۆیدا هێنا كه‌ له‌ نزیك و دووره‌وه‌ چاودێری ئه‌م دۆخه‌ی ئێستای ده‌زگای سه‌رده‌م ده‌كه‌ن ، چونكه‌ به‌ هیچ جۆرێك نابێت زمانی هه‌ڕه‌شه‌ و فیشه‌‌ك جێگه‌ی زمانی نوسین و وه‌ڵامدانه‌وه‌ به‌ قه‌ڵه‌م بگرێته‌وه‌.

بۆچونی سێیه‌م
ئه‌وانه‌ی كه‌ له‌ دووره‌وه‌ چاودێری كێشه‌كه‌ ده‌كه‌ن و ده‌نگیان ناگاته‌ سه‌ر كاغه‌ز له‌ به‌رگی نوسیندا، ده‌بنه‌ بۆچونی سێیه‌م له‌م پرسه‌دا، واته‌ كه‌سانی شه‌قام و شوێنه‌ گشتیه‌كان و ناوه‌نده‌ ڕۆشنبیریه‌كان، ئه‌وانه‌ی كه‌ ته‌نها بۆچونه‌كانیان له‌ شێوه‌ی زاره‌كیدا ده‌رده‌بڕن، ئه‌وان له‌ ڕوانگه‌ی جیاوازه‌وه‌ له‌ پرسه‌كه‌ ده‌ڕوانن، هه‌ندێكیان سه‌رسامی خۆیان ده‌رده‌بڕن كه‌ ده‌زگایه‌كی له‌وشێوه‌ی ڕۆشنبیری له‌و دیو په‌رده‌كانی توانای پێزانینی ئه‌وانه‌وه‌ به‌وشێوه‌ بێت، دڵگرانن به‌وه‌ی له‌لایه‌ن هه‌ندێك نوسه‌ره‌وه‌ سه‌نگه‌ر به‌رامبه‌ر یه‌كدی ده‌گیرێت و له‌بری ئه‌وه‌ی توانای نوسینه‌كانیان له‌ پرسگه‌لی گرنگتردا به‌ گه‌ڕ بخه‌ن دێن و ده‌بنه‌ خۆره‌ی یه‌كتر، هه‌ندێكی تر بۆچونیان وایه‌ ده‌بێت بزانن ڕۆشنبیرو نوسه‌رو ئه‌وانه‌ی كه‌ خاوه‌ن قه‌له‌می ئه‌م هه‌رێمه‌ن خه‌ریكی چین ؟ ئایا هه‌مان ئه‌و كه‌سانه‌ن كه‌ ئێمه‌ له‌ سه‌ر كاغه‌زه‌كان ده‌یانبینین یاخود كه‌سانێكی جیاوازترن؟ هه‌ندێك نیگه‌رانی ئه‌وه‌ن كه‌ له‌لایه‌ن ڕۆشنبیرانه‌وه‌ بۆچونه‌كانیان وه‌ك هیچ سه‌یر ده‌كرێت و هه‌ركاتێك بخوازن ڕه‌خنه‌یه‌ك له‌ ڕۆشنبیرێك یان نوسه‌رێك بگرن له‌لایه‌ن هه‌ندێك له‌و ڕۆشنبیرانه‌ به‌ نه‌فام و جاهیل و نه‌زان ئاژمار ده‌كرێن، كه‌واته‌ بۆچونگه‌لی جیاواز هه‌یه‌ و تیڕوانینی جیاوازیش ، به‌ڵام ئه‌وه‌ی كه‌ بۆچونێكی گشتگره‌ ئه‌وه‌یه‌، هیچ كه‌س و لایه‌ن و ده‌زگایه‌ك نیه‌ به‌ شێوه‌یه‌ك پیرۆز بێت كه‌ شایه‌نی ره‌خنه‌ نه‌بێت، یاخود له‌سه‌رووی ڕه‌خنه‌وه‌ بێت، به‌ڵكو ده‌بێت وه‌ك هه‌ر ده‌زگاو شوێنێكی تر ئه‌گه‌ر گه‌نده‌ڵی یاخود ناشه‌فافی له‌ ناوه‌ندیكی رۆشنبیریشدا بێت ئاگادار بن و له‌ ژێر هیچ ناوێكدا په‌رده‌پۆش نه‌كرێت، ده‌زگای سه‌رده‌میش ناوه‌ندێكی رۆشنبیری ئه‌م هه‌رێمه‌یه‌و مافی هه‌موو نوسه‌رو ڕۆشنبیر و خوێنه‌رێكه‌‌ بزانێت بارودۆخی ئه‌م ده‌زگایه‌ به‌چی ئاڕاسته‌یه‌كدا هه‌نگاو ده‌نێت.
((ماویه‌تى..))

© هه‌موو مافه‌كان پارێزراون بۆ Shaqam.Net (هه‌موو مافه‌کان تایبه‌ته‌ به‌م سایته‌.)
کۆپی کردنی بابه‌ته‌کان به‌ هێنانی ناوی سایت و دانانی به‌سته‌ری سه‌رچاوه‌ رێگه‌ پێدراوه‌‌.

نوسراوه‌ له‌ به‌رواری : 16 گه‌ڵارێزان ، 2709 (415 خوێندراوه‌ته‌وه)